GÝPUGARNAGAUL

 
Söngkona, sem ef til vill er líka álfkona, og tónlistarmaður, sem kannski er tröll, vita ekki hvaðan á sig stendur veðrið þegar til þeirra stormar glorhungruð furðupersóna í leit að risa með gullhár, ásamt vini sínum litla snjótittlingnum. Það má með sanni segja að hún setji rólyndislega tilveru þeirra á annan endann með hamaganginum í sér, en spurningin er hvort þeim tekst að hafa hemil á öllum gýpuganginum

Gýpugarnagaul er sýning sem byggð er á gömlum íslenskum munnmælasögum og kveðskap. Við efnissöfnun var víða leitað fanga, í hljóðritasafni Árnastofnunar sem og í rituðum heimildum. Sögum sem lengi hafa lifað í munnlegri geymd er fléttað saman við vísur og kvæði svo úr verður eitt samfellt ævintýri kryddað söng og hljóðfæraleik. Inn á milli má einnig greina brot úr kveðskap skálda eins og Hallgríms Péturssonar og Jóhannesar úr Kötlum.

Hér segir frá Gýpu, sem er sífellt svöng og gleypir í sig allt sem á vegi hennar verður án þess að hugsa um afleiðingarnar. Við kynnumst líka Snæja snjótittlingi sem á ráð undir rifi hverju en breytist í sólskríkju þegar sólin hækkar á lofti, heyrum af risanum ógurlega með gullhárin, prinsessunni Dettiklessu og fleiri furðum. Allt er þetta kryddað með vísum og kviðlingum, söng og leik meðan undir hljómar garnagaul Gýpu.

Á sviðinu eru leikkonan Alda Arnardóttir, söngkonan Þórunn Elín Pétursdóttir og tónlistarmaðurinn Birgir Bragason með stóra kontrabassann sinn. Leikstjóri sýningarinnar er Sigrún Valbergsdóttir, umsjón tónlistar er í höndum Báru Grímsdóttur en leikmynd og búninga hannar Messíana Tómasdóttir. Handritið er eftir Pétur Eggerz og Sigrúnu Valbergsdóttur, en sérlegur ráðgjafi hópsins er Rósa Þorsteinsdóttir, þjóðfræðingur og rannsóknarlektor á þjóðfræðisviði hjá Stofnun Árna Magnússonar.  
 

Sýningin er ætluð börnum á aldrinum

2ja - 10 ára

Gýpugarnagaul er ferðasýning sem hægt er að fá í heimsókn í grunn- og leikskóla. Upplýsingar um verð fyrir hópa má finna með að smella hér.

SMELLIÐ HÉR TIL AÐ LESA GAGNRÝNI UM SÝNINGUNA

SMELLIÐ HÉR TIL AÐ SKOÐA MYNDIR ÚR SÝNINGUNNI