Möguleikhúsið 

Leikárið 2011-2012 

Möguleikhúsið fagnaði 20 ára afmæli á árinu 2010, en leikhúsið var stofnað á vormánuðum 1990. Að vanda verður í vetur boðið upp á úrval sýninga fyrir yngri áhorfendurna og ferðast með sýningar milli grunn- og leikskóla um land allt.

Þær sýningar sem í boði eru veturinn 2011 – 2012 eru þessar:

GÝPUGARNAGAUL

Gýpugarnagaul er sýning sem byggð er á gömlum íslenskum munnmælasögum og kveðskap. Hér segir frá Gýpu, sem er sífellt svöng og gleypir í sig allt sem á vegi hennar verður án þess að hugsa um afleiðingarnar. Við kynnumst líka litla snjótittlingnum sem á ráð undir rifi hverju, en breytist í sólskríkju þegar sólin hækkar á lofti, heyrum af risa með gullhár, prinsessunni Dettiklessu og fleiri furðum. Allt er þetta kryddað með vísum og kviðlingum, söng og leik meðan undir hljómar garnagaul Gýpu.

Fyrir áhorfendur á aldrinum 2ja – 10 ára

PRUMPHÓLLINN
eftir Þorvald Þorsteinsson
Hulda er nýflutt úr borginni og upp í sveit. Þegar hún fer í feluleik með Halla bróður sínum villist hún og ratar ekki heim. Henni líst ekkert umhverfið þar sem allt er framandi.
Við sérkennilegan hól hittir hún Steina. Hann er kátur tröllastrákur í skrítnum fötum sem segir Huldu að hóllinn sé í raun pabbi sinn. Hann hafi lent í sólargeisla og orðið að steini eftir að hafa borðað rosalega mikinn hundasúrugraut. En grauturinn varð ekki að steini. Ónei, hann ólgar enn svo drynur í hólnum. Og fýlan…..maður lifandi!
Fyrir áhorfendur á aldrinum 2ja – 10 ára

ALLI NALLI OG TUNGLIÐ
Leiksýning byggð á sögum Vilborgar Dagbjartsdóttur. 
Af hverju er tunglið stundum stórt og kringlótt en stundum langt og mjótt? Hvað gerist ef Alli Nalli gefur tunglinu gautinn sinn? Er nokkur ástæða til að óttast þetta skínandi bjarta tungl sem lýsir okkur í dimmunni?
Sýningin, sem ætluð er yngstu áhorfendunum, byggir á sögum Vilborgar Dagbjartsdóttur og var tilnefnd til Grímunnar – íslensku leiklistarverðlaunanna sem barnasýning ársins 2009.
Fyrir áhorfendur á aldrinum 1 – 7 ára

JÓLARÓSIR SNUÐRU OG TUÐRU
byggt á sögum Iðunnar Steinsdóttur
Jólin nálgast og mamma Snuðru og Tuðru ætlar að kenna börnunum í skólanum bútasaum, þannig að þau geti sjálf útbúið sitt eigið jólaskraut. Við kennsluna nýtur hún aðstoðar Theodóru í næsta húsi. En þeim gengur illa að koma sér að efninu, því þær eru alltaf að rekast á eitthvað skondið sem leiðir talið að óþekktarormunum, Snuðru og Tuðru. Þá birtast þær ljóslifandi, en eins og við er að búast gengur jólahaldið ekki snurðulaust fyrir sig þegar þær Snuðra og Tuðra eru annars vegar.
Fyrir áhorfendur á aldrinum 2ja – 10 ára.
Sýningar hefjast í lok nóvember.

VÖLUSPÁ

Völuspá var frumsýnd í Möguleikhúsinu á Listahátíð í Reykjavík vorið 2000. Sýningin var tilnefnd til menningarverðlauna DV fyrir árið 2000 og hlaut Grímuna - íslensku leiklistarverðlaunin 2003
Verkið byggir á hinni fornu Völuspá og veitir áhorfendum sýn inn í hugmyndaheim heiðinnar goðafræði. Þar segir m.a. frá fróðleiksfýsn Óðins, græðgi í skáldamjöðinn, forvitni hans um nútíð og framtíð, Fenrisúlfi, Baldri, Loka, Hugin og Munin og ótal fleiri persónum.

Fyrir eldri bekki grunnskóla og framhaldsskóla. 
 

AÐVENTA
eftir Gunnar Gunnarsson í leikgerð og leikstjórn Öldu Arnardóttur
Aðventa er án efa vinsælasta saga Gunnars Gunnarssonar og er enn gefin út í stórum upplögum víða um lönd. Vinnumaðurinn Benedikt fer til fjalla í vetraríki aðventunnar að leita þess fjár sem eftir varð er smalað var um haustið. Það er köllun hans að koma þessum villuráfandi sauðum í öruggt skjól fyrir hátíðirnar. Klassísk saga um náungakærleika og fórnfýsi.
Fyrir eldri bekki grunnskóla og framhaldsskóla.

ÍSLENSKU JÓLASVEINARNIR Í ÞJÓÐMINJASAFNINU

í fjölda ára hefur Möguleikhúsið aðstoðað Þjóðminjasafnið við að taka á móti íslensku jólasveinunum er þeir fara að tínast til byggða á aðventunni. Það er jafnan mikið um dýrðir er þeir byrja að láta sjá sig og fjöldi barna sem mætir í safnið til að fagna þessum fjörlegu bræðrum.

Þá hafa foreldrar þeirra, þau Grýla og Leppalúði, gjarnan kíkt við skömmu áður en fyrsti sveinninn kemur, svona rétt til að fullvissa sig um að allt sé í lagi og bræðrunum sé óhætt að láta sjá sig. Stundum hafa þau jafnvel tekið sjálfan jólaköttinn með sér.